Steypiregn… á sólinni
30. júní 2014

Stundum er vont veður á sólinni, alveg eins og á Jörðinni, bálhvasst og úrhellisrigning. Ólíkt stormum á Jörðinni er regnið á sólinni ekki úr vatni, heldur rafmögnuðu, ofurheitu gasi sem kallast rafgas eða plasma. Regnið steypist niður úr efri hluta lofthjúps sólar, sem kallast kóróna, á yfirborðið á um það bil 200.000 km hraða á klukkustund í mörg þúsund risavöxnum dropum — hver á stærð við Ísland!

Þetta ótrúlega fyrirbæri uppgötvaðist fyrst fyrir næstum 40 árum. Stjörnufræðingar sem rannsaka sólina geta nú í fyrsta sinn skoðað rigninguna á sólinni í smáatriðum, þökk sé fyrsta flokks gervitunglum og sjónaukum á Jörðinni, og eru nú fyrst að skilja hvernig steypiregnið ógurlega verður til.

Í ljós hefur komið að sólarregnið verður til á mjög svipaðan hátt og regn á Jörðinni. Séu aðstæður í lofthjúpi sólar réttar gufar rafgasið upp af yfirborðinu og heit ský úr rafgasi myndast. Skýin kólna síðan, þéttast og falla að lokum aftur á sólina sem ótrúlega heitt rafgasregn.

Hins vegar hefst myndun regnskýja á sólinni á harla ólíkan hátt en á Jörðinni. Sólblossar eru öflugustu sprengingarnar í sólkerfinu og hjálpa til við að hita upp lofthjúp sólar og hrinda af stað uppgufun rafgassins.

Fróðleg staðreynd

Kóróna sólar er um 2 milljón °C heit, miklu heitari en yfirborð sólar sem er kalt í samanburði eða „aðeins“ 6000°C. Enginn veit í raun hvers vegna lofthjúpur sólar er svona heitur.

This Space Scoop is based on a Press Release from RAS.
RAS

Þýðing: Sævar Helgi Bragason/Stjörnufræðivefurinn

Mynd
Prentvæn útgáfa
Fleiri Space Scoops

Enn forvitin(n)? Lærðu meira...

Hvað er Space Scoop?

Lærðu meira um stjörnufræði

Veitir næstu kynslóð geimkönnuða innblástur

Vinir Space Scoop

Hafðu samband

This website was produced by funding from the European Community's Horizon 2020 Programme under grant agreement n° 638653